වත්මන් ආණ්ඩුව අයවැය සකස් කිරීමේ දී රාජ්‍ය නිලධාරීන් සහ ජාත්‍යන්තර මූල්‍ය අරමුදල සමග පමණක් කතා කොට තීරණ ගැනීමේ ප්‍රතිඵලය නිසා දුක් විඳීමට සිදුවන්නේ රටේ මහජනතාවට බව එක්සත් ජනරජ පෙරමුණේ නායක පාඨලී චම්පික රණවක මහතා ප්‍රකාශ කරයි.
ඔහු මේ බව ප්‍රකාශ කළේ, රජයේ වෛද්‍ය නිලධාරීන්ගේ සංග‍මයේ නියෝජිතයන් (GMOA) සහ එක්සත් ජනරජ පෙරමුණ අතර එක්සත් ජනරජ පෙරමුණු ප්‍රධාන කාර්යාලයේ දී පැවැති සාකච්ඡාවකින් අනතුරුව ය.
මාධ්‍ය වෙත වැඩිදුරටත් අදහස් දැක්වූ එක්සත් ජනරජ පෙරමුණේ නායක පාඨලී චම්පික රණවක මහතා;
“වෛද්‍ය නිලධාරීන්ගේ සංගමය අපිට පැහැදිලි කළා රජයේ නව අයවැයෙන් සිදු කරපු වැටුප් සංශෝධනය මගින් ඒ අයට සිදුවෙලා තියෙන ගැටළු ගැන. අපිත් සතුටු වෙනවා ඇත්තටම මූලික වැටුප වැඩි කිරීමට රජය ගත්ත තීරණය සම්බන්ධයෙන්. නමුත් රජයේ වෛද්‍ය නිලධාරියා කියන්නේ සාමාන්‍යයෙන් වෙනත් අයෙකුට ඒ රාජකාරී ආවරණය කරන්න බැහැ. ඒ වගේම සෞඛ්‍ය සේවයේ සියලුම සේවක, සේවිකාවන්ගේ කැපවීමෙන් ඉතාම හොඳ මට්ටමකට මේ රටේ සෞඛ්‍ය සේවය ඇවිල්ලා තියෙනවා කවුරු මොනවා කිව්වත්.
ඉතින් අපගේ සෞඛ්‍ය දර්ශක දියුණු රටක මට්ටමට තියෙනවා. අපේ අවට කලාපයේ රටවල් එක්කවත් සංසන්දනය කරන්න බැහැ. ඒකට මේ රජයවන් වල කරපු ආයෝජන වගේම සෞඛ්‍ය ක්ෂේත්‍රයේ සේවක, සේවිකාවන්ගේ කැපවීමත් සෑහෙන්න හේතු වෙලා තියෙනවා. ඒ වගේම රජයේ වෛද්‍ය නිලධාරීන්ගේ සංගමය එක්ක අවුරුදු තිස් පහකට වැඩි කාලයක් අපි කටයුතු කරනවා. මේ රටේ නිදහස් අධ්‍යාපනය රැක ගැනීම සඳහා විශේෂයෙන්ම රාගම පවත්වපු පෞද්ගලික වෛද්‍ය විද්‍යාලය, ජනසතු කිරීමේ ක්‍රියාවලිය. ඒක ඔය සමහර හිතන විදිහේ සන්නද්ධ අරගල නිසා වෙච්ච දෙයක් නෙමෙයි. රජයේ වෛද්‍ය නිලධාරීන්, හෙද කාර්ය මණ්ඩල, ශිෂ්‍ය ව්‍යාපාරය, සියලු දෙනාම එකඟතාවයෙන් වෙච්ච දෙයක්. එතන ඉඳන් සයිටම් එක දක්වා මේ සිදුවෙච්ච, නිදහස් සෞඛ්‍ය ක්‍රියාවලිය රැකගැනීමටත් විශාල මෙහෙවරක් වෛද්‍ය නිලධාරීන් කරලා තියෙනවා.
ඉතින් ඒ අයගේ ප්‍රශ්නෙ තමයි, මේ අමතර රාජකාරි, රාජකාරී කටයුතු දවසට නියම වෙලා තියෙන රාජකාරි කටයුතුවලට අමතරව, කරන රාජකාරි කටයුතු වලට මෙතෙක්, මූලික පඩියෙන් ගෙවපු අසූවෙන් එකක පැයකට ගෙවපු ගාන වෙනස් කිරීම. ඒ වගේම නිවාඩු දින වලට ඔවුන්ට ලැබිච්ච ඒ අමතර දීමනාව, ඒ තිබිච්ච අනුපාත වෙනස් කිරීම. ඒ නිසා ඒගොල්ලන්ට බලගතු අසාධාරණයක් ඒ මගින් සිද්ධ වෙනවයි කියන එක තමයි ඔවුන් ප්‍රකාශ කළේ. දැන් මතක තියාගන්න ඕනෙ ගිය වසරේත් රනිල් වික්‍රමසිංහ පාලනයත්, වෛද්‍යවරුන්ගේ දීමනාව වැඩි කළා රුපියල් තිස්පන්දහකින්. නමුත් මේ වැඩිවෙන ජීවන තත්වයයි, මේ වෘත්තීයවේදීන් රට යාම පිළිබඳව තියෙන ගැටලුවයි එක්ක මේ ක්ෂේත්‍ර ලොකු අර්බුදයකට ගිහින් තියෙන්නේ. ප්‍රකාශ කරන දේවල් ඉටු කරන්න කැපවීම, වගවීම. ජනාධිපතිවරයා හා විශේෂයෙන්ම සෞඛ්‍ය ඇමතිවරයා මේ සම්බන්ධයෙන් අර වෘත්තීය සමිතිවල පැරණි න්‍යාය ධර්ම අනුව, ඒ කියන්නේ පොඩි මිනිහට කම්කරුවට විතරයි අපි වැඩි කරන්නේ. අනිත් අයට වැඩි කරන්නෑ වගේ න්‍යාය ධර්ම ඇතැම් ඇමතිවරු ප්‍රකාශ කරලා තියෙනවා. ඒ වගේ ක්‍රියාවන් කරන්නේ නැතුව මේ වෘත්තීය මට්ටමේ පිරිස් එක්කත්, හෙද කාර්ය මණ්ඩල සහ අනෙකුත් අය එක්කත් විධිමත් කළ යුතුයි. ඇත්තටම මේ සාකච්ඡාව කරන්න තිබුණේ අයවැයට පෙර. ඉතින් කම්කරු පන්තිය නියෝජනය කරනවා කිව්වට මොකද, අයවැයට පෙර එවැනි කිසිම සාකච්ඡාවක් වෘත්තීය සමිතිත් එක්ක කරලා නෑ.
රාජ්‍ය නිලධාරිනුයි, ජාත්‍යන්තර මූල්‍ය අරමුදලයි එක්ක විතරක් කතා කරලා ඇවිල්ලා තීරණ ගැනීමේ ප්‍රතිඵල තමයි මේ. ඉතින් මේවායින් දුක් විඳින්න වෙන්නේ මේ රටේ ජනතාවට. ඉතින් ඒ නිසා අපි බලාපොරොත්තු වෙනවා, රජයේ වෛද්‍ය නිලධාරීනුත්, රජයත් පැරණි වැරදි අතහැරලා, මේ අවස්ථාවේදී සාකච්ඡා ක්‍රියාදාමයකට ගිහිල්ලා, මේ රටේ රෝගීන් සහ සාමාන්‍ය ජනතාව අපහසුතාවයට පත් නොවන ආකාරයට මේ ප්‍රශ්නය විසඳගනී කියලා. විශේෂයෙන් වෘත්තීයවේදී ක්ෂේත්‍රවලට තියෙන මේ අකටයුත්ත නිවැරදි කරන්න රජය ක්‍රියා කරයි කියලා.
– Media unit
