ඉරානය වෙතින් එල්ල විය හැකි දැඩි ආරක්ෂක තර්ජනවලට ප්‍රතිචාර වශයෙන්, එක්සත් රාජධානියේ පිහිටි ‘මිල්ඩෙන්හෝල්’ (Mildenhall) රාජකීය ගුවන් හමුදා කඳවුරේ ස්ථානගත කර තිබූ සිය හමුදා ගුවන් යානා වෙනත් ස්ථාන වෙත ගෙන යාමේ ක්‍රියාවලිය එක්සත් ජනපදය විසින් ආරම්භ කර ඇති බව ‘වෝල් ස්ට්‍රීට් ජර්නල්’ (Wall Street Journal) වාර්තාවක් උපුටා දක්වමින් වාර්තා වේ.
එම වාර්තාවට අනුව, මිල්ඩෙන්හෝල් කඳවුරේ මීට පෙර ස්ථානගත කර තිබූ ඉන්ධන නැවත පිරවීමේ ටැංකි ගුවන් යානා දෙකක් (refueling tanker aircraft) මේ වන විටත් ජර්මනිය වෙත මාරු කර යවා ඇත. මීට අමතරව, එම කඳවුරේ තිබූ තවත් සහායක ගුවන් යානා කිහිපයක් ද යුරෝපය පුරා පිහිටි සසුදුසු හමුදා කඳවුරු වෙත කඩිනමින් යොමු කිරීමට පියවර ගෙන තිබේ.
මිල්ඩෙන්හෝල් කඳවුරේ සහ ‘ලේකන්හීත්’ (Lakenheath) යන අනෙක් කඳවුරේ ආරක්ෂිත තත්ත්වය ‘FP-Con Charlie’ (Force Protection Condition Charlie) මට්ටම දක්වා ඉහළ නංවා ඇති බව ඇමරිකානු නිලධාරීන් තහවුරු කර ඇත. මෙම ඉහළ දැමූ හදිසි නියෝගය මඟින් අදහස් වන්නේ ත්‍රස්ත ප්‍රහාරයක් එල්ල වීමේ වැඩි සම්භාවිතාවක් පවතින බව හෝ පවතින තර්ජන පිළිබඳව පැහැදිලි බුද්ධි තොරතුරු ලැබී ඇති බවයි. මෙය එක්සත් ජනපද ආරක්ෂක දෙපාර්තමේන්තුව මඟින් නිකුත් කරනු ලබන දෙවැනි ඉහළම හදිසි ආරක්ෂක අනතුරු ඇඟවීමේ මට්ටම වේ.
මෙම තත්ත්වය පිළිබඳව අදහස් දක්වමින් බ්‍රිතාන්‍ය ආරක්ෂක අමාත්‍යාංශයේ ප්‍රකාශකයෙකු සඳහන් කළේ, වෙනත් රටවල හමුදා මෙහෙයුම් සම්බන්ධයෙන් ප්‍රසිද්ධියේ අදහස් දැක්වීම සාමාන්‍යයෙන් තමන් විසින් සිදු නොකරන බවයි. කෙසේ වෙතත්, අවශ්‍ය මෙහෙයුම් ක්‍රියාපටිපාටියක් ලෙස ගුවන් යානා වෙනත් ස්ථාන වෙත මාරු කිරීම සාමාන්‍යයෙන් සිදුවන්නක් බව හෙතෙම වැඩිදුරටත් පැවසීය. මෙහෙයුම්වල පවතින රහස්‍යභාවය හේතුවෙන් එක්සත් ජනපද ගුවන් හමුදාව මේ පිළිබඳව වැඩිදුර තොරතුරු අනාවරණය කිරීම ප්‍රතික්ෂේප කර ඇත.
