සමාජය වෙළාගෙන ඇති මත්ද්‍රව්‍ය ව්‍යසනයෙන් ජනතාව මුදාගැනීම සඳහා, ආගමික අනුශාසනා සහ දේශනා අතරතුර අවම වශයෙන් මිනිත්තු පහක (05) කාලයක් මත්ද්‍රව්‍ය භාවිතයේ ඇති බිහිසුණු විපාක පිළිබඳව මහජනතාව දැනුවත් කිරීමට වෙන්කරන ලෙස නියෝජ්‍ය අමාත්‍ය සුනිල් වටගල මහතා පූජනීය මහා සංඝරත්නය ඇතුළු සර්ව ආගමික නායකයන්ගෙන් ඉල්ලීමක් කරයි.
මෙරට මුහුණ දී සිටින බරපතලම සමාජ අර්බුදයකට විසඳුම් සෙවීම සඳහා ක්‍රියාත්මක කෙරෙන පුළුල් ජාතික වැඩසටහනට සමගාමීව නියෝජ්‍ය අමාත්‍යවරයා මෙම විශේෂ ඉල්ලීම සිදුකර ඇත.
පවතින මත්ද්‍රව්‍ය වසංගතයට මුහුණ දීමේදී නීතිමය පියවරයන් පමණක් ප්‍රමාණවත් නොවන බවත්, ඒ සඳහා ආගමික නායකයන්ගේ සෘජු මාර්ගෝපදේශනය සහ ආත්මික මැදිහත්වීම අත්‍යවශ්‍ය වන බවත් වටගල මහතා අවධාරණය කළේය. මත්ද්‍රව්‍ය භාවිතය නිසා ඇතිවන විනාශකාරී බලපෑම් පිළිබඳව සමාජය දැනුවත් කිරීමේදී ආගමික නායකයන්ට විශාල කාර්යභාරයක් ඉටුකළ හැකි බව හෙතෙම පෙන්වා දුන්නේය.
“ඉරිදා දහම් පාසල්, පූජා පවත්වන අවස්ථාවල හෝ වෙනත් ඕනෑම ආගමික දේශනාවකදී මත්ද්‍රව්‍ය නිසා සිදුවන විනාශය පිළිබඳව ජනතාව දැනුවත් කිරීම අත්‍යවශ්‍ය කරුණක් ලෙස අප විශ්වාස කරනවා. මත්ද්‍රව්‍ය භාවිතයෙන් සිදුවන ජීවිත හා සමාජ විනාශය පිළිබඳව කතා කිරීමට මිනිත්තු පහක කාලයක් වෙන්කිරීම පූජක පක්ෂයේ කාලෝචිත වගකීමක්,” යැයි පවසමින් ඔහු මෙම ප්‍රයත්නයේ ඇති වැදගත්කම අවධාරණය කළේය. “මෙය අපගේ ආගමික නායකයන් වෙත යොමු කරන ඉතා සැබෑ වූත්, ගෞරවනීය වූත් ඉල්ලීමක්,” යැයි ද ඔහු වැඩිදුරටත් කියා සිටියේය.
