දිත්වා සුළි කුණාටු තත්ත්වයත් සමඟ තලවකැලේ ග්‍රේට්වෙස්ටන් වතුයායේ ඇති වූ නායයෑමේ අවදානම හේතුවෙන් අවතැන්ව සිටින ජනතාව, තමන්ට සිදුවන අසාධාරණයට එරෙහිව ශ්‍රී ලංකා මානව හිමිකම් කොමිෂන් සභාවට පැමිණිල්ලක් ඉදිරිපත් කර තිබේ. දැනට තලවකැලේ දෙමළ විද්‍යාලයේ රැඳී සිටින මෙම පිරිස චෝදනා කරන්නේ, ලබන මස 05 වන දින පාසල් ආරම්භ වීමට නියමිත බැවින් බලධාරීන් තමන්ට වහාම ඉන් ඉවත් වී නැවතත් අවදානම් සහිත ලැයිම් නිවාස වෙත යන ලෙස බලපෑම් කරන බවයි.
ජාතික ගොඩනැගිලි පර්යේෂණ ආයතනය (NBRO) නිසි පරීක්ෂාවකින් තොරව එම නිවාස පදිංචියට සුදුසු බවට නිර්දේශ කර ඇති බවත්, නමුත් එම ස්ථාන තවමත් දැඩි නායයෑමේ අවදානමක පවතින බවත් පදිංචිකරුවෝ පෙන්වා දෙති. තමන්ගේ ජීවිත අවදානමේ හෙළනවා වෙනුවට පදිංචි වීමට ස්ථිර ඉඩමක් ලබා දෙන්නේ නම්, තාවකාලිකව හෝ කුඩා නිවසක් ඉදිකරගෙන තම ජීවිත ආරක්ෂා කර ගැනීමට සූදානම් බව එම ජනතාව බලධාරීන්ගෙන් ඉල්ලා සිටිති.
