චීන කොමියුනිස්ට් පක්ෂය (CPC) පිහිටුවා වසර 105ක් සපිරීම නිමිත්තෙන් සංවිධානය කරන ලද සුවිශේෂී උත්සවයක් පසුගිය බදාදා (01) කොළඹ සිනමන් ලයිෆ් (Cinnamon Life) හෝටලයේදී උත්කර්ෂවත් අන්දමින් පැවැත්විණි.
ශ්රී ලංකාවේ චීන තානාපති කාර්යාලය විසින් සත්කාරකත්වය සැපයූ මෙම අවස්ථාවට මෙරට කැබිනට් අමාත්යවරුන්, පාර්ලිමේන්තු මන්ත්රීවරුන්, ප්රධාන දේශපාලන පක්ෂ නියෝජිතයන් මෙන්ම විදේශීය රාජ්ය තාන්ත්රික නිලධාරීන් පිරිසක් ද එක්ව සිටියහ.
මෙහිදී ආරම්භක දේශනය සිදුකළ ශ්රී ලංකාවේ චීන තානාපති චී චෙන්හොං (Qi Zhenhong) මහතා, චීන කොමියුනිස්ට් පක්ෂයේ ආරම්භය සහ පසුගිය ශතවර්ෂයක කාලය තුළ චීනය ලබා ඇති සුවිශේෂී ආර්ථික හා තාක්ෂණික ප්රගතිය පිළිබඳව කරුණු පැහැදිලි කළේය. මිනිස් සංහතිය වෙනුවෙන් පොදු අනාගතයක් ගොඩනැඟීම සඳහා චීන ජනාධිපති ෂී ජින්පින් මහතා සතු දැක්ම ද ඔහු මෙහිදී සිහිපත් කළේය.
චීනයේ ‘තීරය සහ මාවත’ (Belt and Road) වැඩපිළිවෙළ මගින් මහාද්වීප සහ සාගර එකිනෙකට සම්බන්ධ වන ආකාරය පෙන්වා දුන් තානාපතිවරයා, චීනය විසින් හඳුන්වා දුන් ගෝලීය සංවර්ධන, ගෝලීය ආරක්ෂක, ගෝලීය ශිෂ්ටාචාර සහ ගෝලීය පාලන යන ප්රධාන මුලපිරීම් හතර කාලීන ගැටලුවලට සාර්ථක විසඳුම් සපයා ඇති බව ප්රකාශ කළේය. රටවල් සහ ජාත්යන්තර සංවිධාන 160කට ආසන්න සංඛ්යාවක් මෙම යෝජනා වැළඳගෙන ඇති බවත්, චීනය සැමවිටම ලෝක සාමය සුරකින්නෙකු සහ ගෝලීය සංවර්ධනයට දායක වන්නෙකු ලෙස කටයුතු කරන බවත් ඔහු පැවසීය. එමෙන්ම ශ්රී ලංකාව සහ චීනය අතර පවතින දීර්ඝකාලීන මිත්රත්වය සහ දේශපාලන පක්ෂ අතර පවතින සබඳතා ද ඔහු අගය කළේය.
උත්සවය ඇමතූ ජනතා විමුක්ති පෙරමුණේ (JVP) ප්රධාන ලේකම් ටිල්වින් සිල්වා මහතා ප්රකාශ කළේ, චීන කොමියුනිස්ට් පක්ෂය සිය 105 වසරක ඉතිහාසය තුළ අතිවිශාල ජයග්රහණ රැසක් අත්කර ගනිමින්, එදා දුප්පත් මට්ටමක පැවති රටක් අද වන විට ලෝකයේ ප්රබලතම ආර්ථික බලවතෙකු බවට පරිවර්තනය කර ඇති බවයි.
විපක්ෂ නායක සහ සමගි ජන බලවේගයේ (SJB) නායක සජිත් ප්රේමදාස මහතා අදහස් දක්වමින් කියා සිටියේ, චීනය තාක්ෂණික නවෝත්පාදන, නිෂ්පාදන ක්ෂේත්රය සහ වේගවත් ආර්ථික වර්ධනය අතින් ලෝක නායකත්වයට පත්ව ඇති අතරම, එම සංවර්ධනයේ ප්රතිලාභ ශක්තිමත් සුභසාධන පද්ධතියක් හරහා එරට පොදු ජනතාව වෙත සමසේ බෙදාහැරීමට කටයුතු කර ඇති බවයි.
ශ්රී ලංකා පොදුජන පෙරමුණේ (SLPP) ප්රධාන ලේකම් සාගර කාරියවසම් මහතා සඳහන් කළේ, චීන – ශ්රී ලංකා සහයෝගිතාවේ ඉහළම අවස්ථාව සනිටුහන් වූයේ හිටපු ජනාධිපති මහින්ද රාජපක්ෂ මහතාගේ පාලන සමයේදී බවයි. 1948 නිදහසින් පසු මෙරට තුළ නව වරායන්, ගුවන්තොටුපොළවල්, අධිවේගී මාර්ග සහ බලාගාර ඉදිකිරීමට මෙන්ම කොළඹ වරාය නගරය වැනි ව්යාපෘති හරහා රටේ සිතියම පවා වෙනස් කිරීමට හැකි වූයේ චීනය ලබාදුන් අවංක සහයෝගය නිසා බව ඔහු කෘතඥපූර්වකව සිහිපත් කළේය.
එක්සත් ජාතික පක්ෂයේ (UNP) සභාපති වජිර අබේවර්ධන මහතා ද චීනයේ සංවර්ධනය අගය කළේය. ජනාධිපති ෂී ජින්පින් මහතාගේ නායකත්වය යටතේ චීන ජනතාව මිලියන ගණනින් දරිද්රතාවයෙන් මුදාගැනීමට චීන කොමියුනිස්ට් පක්ෂය සමත්ව ඇති බවත්, එය ලෝක ඉතිහාසයේ අසමසම ජයග්රහණයක් බවත් ඔහු පැවසීය. දෙරට අතර පවතින ඓතිහාසික සබඳතා සිහිපත් කළ අබේවර්ධන මහතා, 1952 වසරේදී ඩඩ්ලි සේනානායක මහතාගේ එක්සත් ජාතික පක්ෂ රජය සමයේ අත්සන් තැබූ ඓතිහාසික ‘රබර් – සහල් ගිවිසුම’ හරහා ලෝකයේ අනෙක් රටවල් චීනය සමඟ සබඳතා පැවැත්වීමට මැලි වූ වකවානුවක පවා ශ්රී ලංකාව චීනය සමඟ නව මිත්රත්වයේ පරිච්ඡේදයක් ආරම්භ කළ බව වැඩිදුරටත් සඳහන් කළේය.
