මැද පෙරදිග කලාපය තුළ පවතින දැඩි යුද වාතාවරණය හමුවේ, කුවේට් රාජ්‍යයේ ගුවන් ආරක්ෂක පද්ධතිවලින් එල්ල වූ ප්‍රහාරයක් හේතුවෙන් තම ප්‍රහාරක යානා තුනක් විනාශ වී ඇති බව ඇමරිකානු මධ්‍යම විධානය නිල වශයෙන් තහවුරු කර සිටියි. මාර්තු 01 වනදා ‘Operation Epic Fury’ මෙහෙයුමට සහය දක්වමින් පියාසර කරමින් තිබූ F-15E Strike Eagle වර්ගයේ ප්‍රහාරක යානා තුනක් මෙලෙස කුවේට් ගුවන් සීමාවේදී ‘මිත්‍ර පාර්ශවීය ප්‍රහාරයකට’ (Friendly Fire) ලක්ව ඇති බව වාර්තා වේ.
ඉරානය විසින් එල්ල කරන බැලිස්ටික් මිසයිල සහ ඩ්‍රෝන ප්‍රහාර හමුවේ සක්‍රීය සටන් පවතින අවස්ථාවක, කුවේට් ගුවන් ආරක්ෂක ඒකක විසින් එල්ල කරන ලද ප්‍රහාරවලින් මෙම ඇමරිකානු යානා වැරදීමකින් බිම හෙළා ඇති බව ඇමරිකානු මධ්‍යම විධානය නිකුත් කළ නිවේදනයේ සඳහන් වේ. පසුගිය සෙනසුරාදා සිට ඇමරිකාව සහ ඊශ්‍රායලය එක්ව ඉරානයට එල්ල කරන ප්‍රහාරවලට ප්‍රතිචාර ලෙස ඉරානය ද ගල්ෆ් කලාපයේ ඇමරිකානු කඳවුරු ඉලක්ක කරමින් ප්‍රහාර එල්ල කරමින් සිටීම මෙම නොසන්සුන්කාරී තත්ත්වයට හේතු වී ඇත.
අනතුරට ලක් වූ යානාවල සිටි ගුවන් නියමුවන් ඇතුළු හය දෙනෙකුගෙන් යුත් කාර්ය මණ්ඩලය නිරුපද්‍රිතව යානාවලින් ඉවත් වීමට සමත්ව ඇති අතර, ඔවුන් මේ වන විට ආරක්ෂිතව මුදාගෙන තිබේ. මෙම අත්වැරදීම සම්බන්ධයෙන් කුවේට් රජය සිය කනගාටුව පළ කර ඇති අතර, සිද්ධිය පිළිබඳව විශේෂ පරීක්ෂණයක් දැනටමත් ආරම්භ කර ඇත.
