වත්මන් රජය බලයට පත්වීමට පෙර ලබා දුන් පොරොන්දු උල්ලංඝනය කරමින් විදුලි බිල අඩු කරනවා වෙනුවට එය වැඩි කිරීමට උත්සාහ කරන බවට විපක්ෂ නායක සජිත් ප්රේමදාස මහතා චෝදනා කරයි. ‘දිට්වා’ සුළි කුණාටුව හේතුවෙන් ලක්ෂ සංඛ්යාත ජනතාවක් පීඩාවට පත්ව සිටින මෙවන් මොහොතක, රජය 11.57%කින් විදුලි බිල වැඩි කිරීමට සූදානම් වීම ජනතා විරෝධී ක්රියාවක් බව ඔහු පෙන්වා දෙයි. ‘පොහොසත් රටක් – ලස්සන ජීවිතයක්’ යන තේමාව යටතේ බලයට පැමිණි රජය මේ වන විට ජනතාවට දුප්පත් ජීවිතයක් උරුම කර දෙමින් සිටින බව විපක්ෂ නායකවරයා වැඩිදුරටත් සඳහන් කළේය.
මැතිවරණ වේදිකාවලදී රුපියල් 9,000ක විදුලි බිල රුපියල් 6,000 දක්වාත්, රුපියල් 3,000ක බිල රුපියල් 2,000 දක්වාත් ලෙස 33%කින් අඩු කරන බවට රජයේ සාමාජිකයන් එදා පොරොන්දු වූ බව ඔහු සිහිපත් කළේය. එහෙත් බලයට පත් වූ පසු එම සියලු පොරොන්දු අමතක කර ජනතාව මත අසීමිත බරක් පැටවීමට කටයුතු කිරීම ජනවරම පාවාදීමක් ලෙස තමන් දකින බව ඔහු ප්රකාශ කළේය. ජනාධිපතිවරයා ඇතුළු රජය ලබා දුන් එම පොරොන්දු විශ්වාස කර ඡන්දය දුන් ජනතාවට අද සිදුව ඇත්තේ දැඩි අසාධාරණයක් බව ද සජිත් ප්රේමදාස මහතා අවධාරණය කළේය.
රජය සිදු කරන මෙම ජනතා විරෝධී ක්රියාවන්ට එරෙහිව ජනතාව පෙළගැසිය යුතු බවත්, ජනතාවගේ කරපිට අසීමිත පීඩනයක් පැටවීම තමන් දැඩි ලෙස හෙළා දකින බවත් විපක්ෂ නායකවරයා සිය ප්රකාශය මගින් වැඩිදුරටත් කියා සිටියේය. මෙවැනි අර්බුදකාරී වාතාවරණයක් තුළ ජනතාවගේ ජීවනෝපාය ආරක්ෂා කිරීමට රජය වහාම මැදිහත් විය යුතු බව ද ඔහු අවධාරණය කළේය.
