රජය විසින් මෑතකදී සිදුකළ තැපැල් ගාස්තු ඉහළ දැමීම හේතුවෙන් මෙරට තැපැල් සේවාව සම්පූර්ණයෙන්ම කඩා වැටීමේ අවදානමක් පවතින බව ප්‍රධාන විපක්ෂය වන සමගි ජන බලවේගය අනතුරු අඟවයි. කොළඹදී පැවති මාධ්‍ය හමුවකට එක්වෙමින් පාර්ලිමේන්තු මන්ත්‍රී මුජිබර් රහුමාන් මහතා ප්‍රකාශ කළේ, රුපියල් 50ක්ව පැවති අවම තැපැල් ගාස්තුව රුපියල් 70ක් දක්වා ඉහළ නැංවීම තැපැල් දෙපාර්තමේන්තුව අඩපණ කර වසා දැමීමේ සූදානමක් බවයි.
තැපැල් දෙපාර්තමේන්තුවේ රැකියා සුරක්ෂිත කර පොදු සේවාවක් ලෙස එය පවත්වා ගැනීමට නම් කළ යුතුව තිබුණේ ගාස්තු අඩු කිරීම බව මන්ත්‍රීවරයා මෙහිදී පෙන්වා දුන්නේය. ගාස්තු ඉහළ දැමීම නිසා ජනතාව තවදුරටත් SMS, MMS සහ WhatsApp වැනි ඩිජිටල් සන්නිවේදන ක්‍රම වෙත යොමු වීම හරහා සම්ප්‍රදායික තැපැල් සේවාවට ඇති ඉල්ලුම වේගයෙන් පහත වැටෙනු ඇති බව ඔහු සඳහන් කළේය. මෙම තීරණය තැපැල් පද්ධතියේ පරිහානිය වේගවත් කිරීමට හේතු වන බව මන්ත්‍රීවරයා වැඩිදුරටත් අවධාරණය කළේය.
