බන්ධනාගාර නිලධාරීන් අට දෙනෙකු ඇතුළු පුද්ගලයන් 28 දෙනෙකුට ජීවිත අහිමි කරමින් සහ නිලධාරීන් හා රැඳවියන් 100කට අධික පිරිසකට තුවාල සිදුකරමින් මීගමුව බන්ධනාගාරය තුළ මෑතකදී ඇති වූ දරුණු ගැටුම සම්බන්ධයෙන් අපරාධ පරීක්ෂණ දෙපාර්තමේන්තුව (CID) මේ වන විට රැඳවියන් ඇතුළු පුද්ගලයන් 150කට වැඩි පිරිසකගෙන් ප්‍රකාශ සටහන් කරගෙන තිබේ.
බන්ධනාගාර දෙපාර්තමේන්තුව විසින් අපරාධ පරීක්ෂණ දෙපාර්තමේන්තුව වෙත කරන ලද පැමිණිල්ලකට අනුව මෙම විමර්ශන කඩිනමින් ආරම්භ කළ බව පොලිසිය ඊයේ (13) ප්‍රකාශ කළේය. එමෙන්ම මෙම ගැටුමට අදාළ අධිකරණ කටයුතු ද ඊයේ දිනයේ සිට ආරම්භ වූ බව බන්ධනාගාර දෙපාර්තමේන්තුව නිවේදනය කර ඇත.
ගැටුම හටගත් දෙවන දිනය වූ පසුගිය සඳුදා (06) මීගමුව බන්ධනාගාරයේ රඳවා සිටි රැඳවියන් 2,400ක පිරිසෙන් බහුතරයක් ඔවුන්ගේ ආරක්ෂාව වෙනුවෙන් සහ තත්ත්වය පාලනය කිරීම සඳහා වෙනත් බන්ධනාගාර වෙත මාරු කර යැවූ බව එම දෙපාර්තමේන්තුව පවසයි. දැනට මීගමුව බන්ධනාගාරය තුළ රැඳවියන් 600ක පමණ පිරිසක් පමණක් ඉතිරිව සිටින අතර ඔවුන් ද ඉදිරි දිනවලදී වෙනත් බන්ධනාගාර වෙත මාරු කිරීමට නියමිතය.
මෙම බන්ධනාගාර පරිශ්‍රය මේ වන විට අපරාධයක් සිදුවූ ස්ථානයක් (Crime Scene) ලෙස නම් කර විමර්ශන කටයුතු සිදුකරන බැවින්, එහි සිටින රැඳවියන් බැලීම සඳහා ඔවුන්ගේ ඥාතීන්ට පැමිණීමට දැනට අවසර නොදෙන බව ද බන්ධනාගාර දෙපාර්තමේන්තුව වැඩිදුරටත් සඳහන් කරයි.
