ඩිcurrentට්වා (Ditwah) සුළි කුණාටුවේ බලපෑම හේතුවෙන් තමන් සතු නිවාස අහිමි වූ නිවාස හිමියන් වෙනුවෙන් ලබාදෙන මාසික නිවාස කුලී දීමනාව තවත් මාස තුනක කාලයකින් දීර්ඝ කිරීමට අමාත්ය මණ්ඩල අනුමැතිය හිමිව තිබේ.
මේ අනුව මීට පෙර මාස හයක කාලයක් සඳහා ලබාදීමට තීරණය කර තිබූ මෙම දීමනාව මාස නවයක් දක්වා දීර්ඝ වන අතර, ස්ථිර හෝ අතුරු නිවාස ඉදිකර අවසන් වන තෙක් අවතැන් වූවන් වෙනුවෙන් තාවකාලික අත්වැලක් ලෙස මෙම පියවර ගෙන ඇත.
දැනට ක්රියාත්මක නැවත පදිංචි කිරීමේ වැඩපිළිවෙළ යටතේ සුදුසු ස්ථානවල ස්ථිර නිවාස ඉදිකර නිමවන තෙක් කෑගල්ල, මහනුවර, නුවරඑළිය සහ බදුල්ල වැනි දැඩි ලෙස පීඩාවට පත් ප්රදේශවල අවතැන් වූ පවුල්වලට ආරක්ෂිත තාවකාලික නවාතැන් සපයා ගැනීම සහතික කිරීම වෙනුවෙන් මෙම සහනය ලබා දී තිබේ. ජාතික ගොඩනැඟිලි පර්යේෂණ සංවිධානයේ (NBRO) මඟපෙන්වීම යටතේ ශ්රී ලංකා යුද හමුදාව විසින් මේ වන විට ඉදිකරනු ලබන ස්ථිර නිවාස මෙන්ම අතුරු සංක්රමණික නිවාස ඒකක (transitional interim housing units) නිමවන තෙක් අපේක්ෂාවෙන් පසුවන පවුල් සඳහා මෙම දීමනාව හිමිවේ.
මේ අනුව, 2025 දෙසැම්බර් 05 වැනි දිනැති අංක 08/2025 දරන අයවැය චක්රලේඛයේ අනුක්රමික අංක 04 වෙත අදාළ සංශෝධන සිදුකර ඇත. ඒ අනුව නිවාස අහිමි වූවන් වෙත තවදුරටත් රුපියල් 25,000 ක මාසික නිවාස කුලී දීමනාව අඛණ්ඩව හිමිවනු ඇත.
භාණ්ඩාගාර ලේකම් ආචාර්ය හර්ෂණ සූරියප්පෙරුම මහතා විසින් මෙම සංශෝධනය පිළිබඳව දැනුවත් කරමින් සියලුම අමාත්යාංශ ලේකම්වරුන්, පළාත් සභා ප්රධාන ලේකම්වරුන්, දෙපාර්තමේන්තු ප්රධානීන්, දිස්ත්රික් ලේකම්වරුන්/ආණ්ඩුවේ ඒජන්තවරුන් සහ ප්රාදේශීය ලේකම්වරුන් වෙත නව චක්රලේඛය නිකුත් කර තිබේ.
